最近全城熱話，莫過於觀塘鯉魚門嶺南新村呢個新建公廁。造價高達3,830萬港元，引來網民一片嘩然，有人嘲諷「買別墅都唔使咁多」。建築署回覆查詢時表示，3,830萬元總費用中，工程合約費用佔2,940萬元，顧問費約540萬元，另有350萬元應急費用。呢個公廁配備13個廁格（4格男廁、7格女廁、通用廁所2格）、8個尿廁、飲水機，甚至具備氣味感測、移動傳感器及訪客反饋系統。
講到呢度，你可能會諗：如果間舖開喺正呢個天價公廁隔籬，係咪可以唔使自己起廁所？
答案係：視乎你開咩舖！
開食肆（有堂食）→ 一定要自己起廁所！
如果你打算開一間有堂食嘅食肆（即申請普通食肆牌照或小食食肆牌照），就算個公廁起得幾靚、幾近、幾貴，你都一定要喺舖內起返自己嘅廁所。
唯一例外係：如果你所在嘅商業大廈有公用廁所供顧客及員工使用，食環署會接納呢種情況而加以考慮。否則，叫客人行去街外嘅公廁？No No No No！
廁所數量方面，按顧客人數決定：
- 少過25位顧客：可設1個男女共用廁所，另加1個男性尿兜
- 25至100位顧客：必須分開男女廁，男廁需有1個水廁、1個洗手盆及1個尿兜；女廁需有1個水廁及1個洗手盆
除咗數量，規格上亦有不少要求：廁所門不可對廚房、要獨立通風、用防水物料。廁所亦不得用作其他用途，嚴禁貯存食物或相關設備。
違規後果可以好嚴重：輕則罰款，重則停牌、釘牌，甚至乎最多坐監六個月！根據《食物業規例》，任何人無牌經營食物業，一經定罪，最高可被判罰款五萬元及監禁六個月。
開外賣店（冇堂食）→ 有員工廁所就夠
如果你開嘅係外賣店（即申請「食物製造廠牌照」），顧客唔會喺舖內堂食，規定就相對寬鬆。呢類舖頭只需要有員工自己用嘅1個洗手間就可以。另外，外賣店須設有最少6平方米的食物室，以及來去水系統。
開零售／服務業 → 通常冇硬性規定
如果你打算開嘅係賣衫賣褲、書店、髮廊等零售或一般服務業，法例通常冇強制要求舖內有廁所。員工可以外出解決，但當然要考慮一個現實問題：關舖去廁所，暫停營業會引致營業額損失。因此，舖內有自己廁所嘅舖位，係值錢好多嘅。
順帶一提：法例規定補習社要有自己嘅男女廁所，但琴行、畫室、芭蕾舞學校就唔使。
總結
行業類別 | 牌照類型 | 廁所要求 |
食肆（有堂食） | 普通食肆牌照／小食食肆牌照 | 一定要有廁所，25人以上要分男女 |
外賣店（冇堂食） | 食物製造廠牌照 | 員工廁所1個 |
零售／服務業 | 一般商業登記 | 通常冇強制要求 |
做食肆，一定要有自己廁所——自己舖內起又好，使用大廈公用廁所又好，總之叫客人用街外公廁？起得幾貴幾靚都唔得！
至於其他大部分行業？No problem！
李根興博士 Edwin
Whatsapp 90361143
www.bwfund.com | www.edwinlee.com.hk
Add comment